मिर्मी (स्याङ्जा) – मिर्मीस्थित कालीगण्डकी अस्पतालसँग सम्बन्धित जग्गा दानको विषय पछिल्लो समय गम्भीर विवादमा परिणत भएको छ। अस्पतालका लागि जग्गा दान गर्ने दाताहरूले तारजालीभित्र सीमित क्षेत्र मात्रै दान गरेको स्पष्ट दाबी गरिरहँदा पनि कालीगण्डकी गाउँपालिकाले आफ्नै नापी-नक्साका आधारमा स्थानीय बासिन्दाका घरजग्गा समेत अस्पताल क्षेत्रभित्र परेको भन्दै विवाद सिर्जना गरिनु चिन्ताजनक विषय बनेको छ।

यसै विषयलाई लिएर मिर्मी इटालिचोकस्थित ‘Hospital Line’ का जग्गा दाता तथा घरजग्गा धनीहरूले वडा कार्यालय-७, मिर्मीमा औपचारिक उजुरी दर्ता गरिसकेका छन्। तर, उजुरी दर्ता भएको लामो समय बितिसक्दा पनि कालीगण्डकी गाउँपालिका र सम्बन्धित वडा कार्यालयको तर्फबाट कुनै ठोस पहल नहुनु स्थानीय सरकारप्रतिको जनविश्वास कमजोर बनाउने कारण बनेको छ।

https://amzn.to/4myfPN5

स्थानीय बासिन्दाहरूले यस विषयमा पूर्व वडा अध्यक्ष मुक्ति प्रसाद भट्टराईसँग समेत प्रश्न उठाइसकेका छन्। यसले यो समस्या अब व्यक्तिगत सीमाभन्दा माथि उठेर सामूहिक सरोकार र सार्वजनिक बहसको विषय बनेको प्रष्ट संकेत गर्छ।

अस्पताल जस्तो जनस्वास्थ्यसँग प्रत्यक्ष जोडिएको संस्थाको विकास आवश्यक र स्वागतयोग्य विषय हो।

तर विकासको नाममा नागरिकको निजी सम्पत्ति अतिक्रमण गर्नु लोकतान्त्रिक शासन प्रणालीमा कदापि स्वीकार्य हुन सक्दैन। जग्गा दानसम्बन्धी कागजात, वास्तविक नापी स्थिति र स्थानीय बासिन्दाको हक-अधिकारलाई बेवास्ता गरेर समस्या समाधान हुने देखिँदैन।

स्थानीय सरकार जनताको प्रतिनिधि संस्था हो, समस्या पन्छाएर मौन बस्ने निकाय होइन।
यसैले, कालीगण्डकी गाउँपालिका र वडा कार्यालयले यो विवादलाई प्राथमिकतामा राखी छिटोभन्दा छिटो समाधान गरोस् भन्ने माग आज मिर्मीका बासिन्दामात्र होइन, सम्पूर्ण सचेत नागरिकको साझा आवाज बनेको छ।